Thursday 8 July 2010

ဆူးရိုင်း နှင်းဆီ (သို့မဟုတ်) The Blood of Flowers

အီရန်စာရေးဆရာမ Anita Amirrezvari  ရဲ့ The Blood of Flowers အမည်ရှိတဲ့ ပထမဦးဆုံး ၀တ္တုလေးပါ။ ၁၇ ရာစုခေတ်က အီရန် ကော်ဇောယက်ကျွမ်းကျင်တဲ့ မိန်းကလေးတစ်ယောက် ရဲ့ ဘ၀ပုံပြင်ကို ရေးပြထားပါတယ်...။  


၁၅နှစ်သမီးအရွယ် Azizam ဆိုတဲ့ မိန်းကလေး ဟာ (အီရန်ထုံးစံအရ) လက်ထပ်ဖို့   သင့်တော်တဲ့အချိန်ကို တော်တော်လေး နီးကပ်လာပြီလို့ဆိုနိုင်ပါတယ်။  မိဘတွေက လက်လုပ်လက်စား မရှိမရှားတွေမို့   (ထုံးစံအရ) သတို့သားကြေး Dowry ပေးဖို့အတွက် အလုံအလောက်မရှိလို့  ကော်ဇောယက် ပါရမီပါလာသူကလေးပီပီ ကော်ဇော အကောင်းစားတစ်ထည်ကို သူကိုယ်တိုင်ယက်လုပ်ပါတယ်။  ရွာထဲမှာ အဲဒီနှစ်မှာပဲ မကောင်းဆိုးဝါး နမိတ်ဆောင်တဲ့ ကြယ်တံခွန်တလုံးကို အားလုံးသတိထားမိကြပါတယ်။  အဲဒီကြယ်တံခွန်က ရွာသူရွာသားတွေကို ဘယ်လိုများ ”ခိုက်”မလဲလို့  အားလုံးက ပူပန်နေကြပါတယ်။  မကြာခင်မှာပဲ သူမကို အလွန်ချစ်တဲ့ သူမဖခင်ဟာ အမဲလိုက်ရင်း ဖျားနာပြီးအိမ်ပြန်ရောက်လာပါတယ်။  ရက်ပိုင်းအတွင်းမှာပဲ သေဆုံးသွားပါတယ်။  ဖခင်သေဆုံးပြီးတော့ စားရေးသောက်ရေး ခက်ခဲလာတာနဲ့အမျှ ပိုင်ဆိုင်မှုတွေကို တစတစ ရောင်းချစားသောက်လာရပါတယ်။ နောက်ဆုံး စားစရာမရှိတော့တဲ့အခါ သူမယက်ထားတဲ့ ကော်ဇောလေးကို ရောင်းချပြီး Isfahan  မြို့တော်က တခါမှ သူတို့သားအမိမမြင်ဖူးတဲ့ အဖေတူအမေကွဲ အဖေ့ညီ ဦးလေး မိသားစုကို ရှာဖွေပြီး သွားရောက်ခိုလှုံရပါတော့တယ်။ ဒါက သူမရဲ့ ခရီးကြမ်းအစပါ။

 ဦးလေးမိသားစုက Isfahan မြို့တော်မှာ အကျော်ကြားဆုံး လူကုံထံ ကော်ဇောကုန်သည်တယောက်ပါ။  ဦးလေးက သူမတို့သားအမိအပေါ် ကြင်နာစိတ်အတော်အတန် ရှိပေမဲ့ ဇနီးဖြစ်သူကတော့ လူပိုလူလျှံ လိုလားပုံမပေါ်ပါ။  သူမတို့သားအမိကအတွက် အိမ်မကြီးထဲက အခန်းကျဉ်းလေးတခုပေးထားပြီး မီးဖိုချောင်အလုပ်တွေကို အိမ်ဖေါ်တွေနဲ့အတူ ၀ိုင်းကူလုပ်ပေးရပါတယ်။ ကံကောင်းတာက Azizam ရဲ့ ကော်ဇောယက်တဲ့အစွမ်းအစကို ဦးလေးက အသိအမှတ်ပြုပြီး သူမတောင်းဆိုလွန်းလို့   သူ့ရဲ့ ကော်ဇောဒီဇိုင်းဆွဲတဲ့ ပညာတချိူ့ကို သင်ပြပေးပါတယ်။   ဒါနဲ့  Azizamဟာ ဘ၀ကြမ်းကနေ အမှီအခိုကင်းကင်း လွတ်မြောက်ဖို့အတွက် ဦးလေးဆီက သိုးမွေးချည်ဝယ်ဖို့ အရင်းအနှီးငွေစကြေးစ တချိူ့ချေးငှားပြီး ကိုယ်ပိုင်ကော်ဇောတစ်ထည်ကို စတင်ယက်လုပ်ခဲ့ပါတယ်။  ဒါကို စိတ်ထားဆိုးတဲ့အဒေါ်က မရှုစိမ့်လို့ သူမကော်ဇောယက်လို့ပြီးခါနီးမှာ ဒတ်ခ်ျကုန်သည်တယောက်ကို အဲဒီကော်ဇော လက်ဆောင်ပေးမယ်လို့  ကတိပေးလိုက်ပါတယ်။  ဒါနဲ့ပဲ Azizam ဟာ ၀မ်းနည်းစွာနဲ့ ဒုတိယကော်ဇောတထည်ကို လနဲ့ချီပြီး ထပ်ယက်ရပြန်ပါတယ်။  ကော်ဇောယက်လို့ လ အနည်းငယ်ကြာတဲ့အခါမှာ သူမဦးလေးကို ခေါ်ပြပါတယ်။  ဦးလေးက ကော်ဇောရဲ့ အရောင်စပ်ပုံ အားနည်းချက်၊ ပြစ်ချက်တွေကိ ပွင့်ပွင့်လင်းလင်းထောက်ပြလိုက်တဲ့အခါ Azizam ဟာ သူ့လက်ရာကိုသူ စိတ်တိုင်းမကျတော့တဲ့အတွက် နောက်တထည်ယက်နိုင်ဖို့ရာ ဖျက်ပစ်လိုက်ပါတယ်။  အဲဒီလုပ်ရပ်ကို ဦးလေးရော အဒေါ်ပါ တအားစိတ်ဆိုးကြတဲ့အတွက် သူမတို့သားအမိ ဆက်လက်နေထိုင်ဖို့ တောင် မသေချာတော့တဲ့ အခြေအနေဖြစ်လာပါတယ်။

Azizam ရောက်စမှာ အဒေါ်က အိမ်နီးချင်း ကြေးရတတ် မိသားစုထဲက  Naheed ဆိုတဲ့ ရွယ်တူမိန်းကလေးနဲ့ မိတ်ဆက်ပေးခဲ့ဘူးပါတယ်။  Naheed ဟာ မျက်လုံးစိမ်းစိမ်း ခန္ဒာကိုယ်သွယ်သွယ်ပြောင်းပြောင်းနဲ့   အလွန်ချောမောလှပသူကလေးပါ။ သူမက Azizam ကို ရိုးသားတဲ့ တောသူကလေးအဖြစ် မြင်မြင်ချင်း ခင်မင်ပါတယ်။  အားလပ်ချိန်တွေမှာ လာလည်ဖို့ အမြဲဖိတ်ပြီး စာရေးတတ် ဖတ်တတ်အောင်လည်း သင်ပေးပါတယ်။ သူမရဲ့ တိတ်တခိုးချစ်သူ မြင်းသမား လူချော  Iskunda အကြောင်းကိုလည်းပြောပြပါတယ်။ Iskunda နဲ့  အဆက်အသွယ်လုပ်ဖို့   မြင်းပွဲတွေကို Azizam ရဲ့အကူအညီနဲ့  တိတ်တိတ်ခိုးသွားပါတယ်။ Naheed ရဲ့အမေ သိသွားတဲ့အခါ Azizam သွားချင်လို့ လိုက်ပို့ရတာဖြစ်ကြောင်း Naheedက ဘူးကွယ်ခဲ့ပါတယ်။ အဒေါ်ကို တိုင်လို့  အဒေါ်ဆူသမျှဒဏ်ကို Azizam တယောက်တည်းက ခံလိုက်ရပါတယ်။   Iskunda ရဲ့ မိသားစုက Naheed ကို လာရောက်တောင်းရမ်းတဲ့အခါ Iskunda မိသားစုရဲ့ စီးပွားရေအခြေအနေကြောင့် ငြင်းပယ်ခံလိုက်ရပါတယ်။ ဒါနဲ့ပဲ   သမီးကိုစိတ်မချတော့တဲ့ Naheed ရဲ့ မိဘတွေက သူတို့ သမီးနဲ့ သင့်တော်မဲ့ သတို့သားလောင်းကို အမြန်ရှာပါတော့တယ်။

အဲဒီဖြစ်ရပ်တွေ မပေါ်ခင်မှာဘဲ Azizam ကို အိမ်လာတဲ့ လူကုံထံ   မုဆိုးဖို Feredoon က ဦးလေးအိမ်ကို လုပ်ငန်းကိစ္စနဲ့လာရင်း မြင်ပြီး သဘောကျသွားခဲ့ပါတယ်။  ဒါပေမဲ့ Azizam ရဲ့ နိမ့်ပါးတဲ့ ဘ၀အခြေအနေကြောင့် လက်ထပ်မယားမဟုတ်ဘဲ သုံးလစာချူပ်နဲ့ ပေါင်းသင်းဖို့သာ ကမ်းလှမ်းခဲ့ပါတယ်။  Azizam နဲ့ သူမမိခင်တို့ အနေနဲ့  စစချင်းမှာ လုံးဝ လက်မခံနိုင်ပေမဲ့   သိပ်မကြာခင်က ယက်လက်စကော်ဇောကိုဖျက်လိုက်လို့  ဦးလေးက အရမ်းစိတ်ဆိုးပြီး အဒေါ်က အိမ်ပေါ်ကနှင်ချတဲ့အချိန်ဖြစ်နေတာရယ်၊  ကော်ဇောဖောက်သည် ကြေးရတတ်မို့  အဒေါ်က တွန်းတွန်းထိုးထိုး ဖိအားပေးတာရယ်၊ သူမတို့မှာ သင့်တော်မဲ့ သတို့သားအတွက် ပေးစရာ  dowry မရှိတာရယ်၊  Azizamလိမ္မာရင် တနေ့  Feredoonက အတည်တကျ လက်ထပ်မှာဘဲလို့  အဒေါ်က နားသွင်းတာရယ်ကြောင့် လက်ခံဖြစ်သွားပါတယ်။  သူမဟာ နေ့ခင်းပိုင်းမှာ ဦးလေးဆီမှာ ကော်ဇောပညာသင်ပြီး၊  Feredoon ဆင့်ခေါ်တဲ့ညမှာ  သူ့အိမ်ကို တိတ်တဆိတ်သွားပြီး ပျော်တော်ဆက်ရပါတယ်။ စစချင်းမှာ အဲဒီလူကို သူမအနေနဲ့   ဘယ်လိုမှ နှစ်သက်လို့ မရခဲ့ပါဘူး။  သူမရဲ့ အေးစက်တဲ့ တုံ့ပြန်မှု၊ ဟန်ဆောင်မှုတွေကို ရိပ်မိတဲ့အတွက် Feredoon ကလည်း ခွာစပြုလာပါတယ်။  ဒါပေမဲ့ သုံးလပြည့်ခါနီးတော့ စာချူပ်ရပ်တော့မလားဆိုတာ Azizam ပူပန်လာရပါပြီ။  အင်းအိုင်လက်ဖွဲ့ ပညာရှင်ဆီမှာ အဆောင်တောင်းရင်းနဲ့   သူမရဲ့အားနည်းချက်တွေကို ပြင်ဖို့သိလာခဲ့ရပါတယ်။  နောက်ဆုံးမှာ မာယာအကုန်သုံးပြီး  Feredoon ရဲ့ စိတ်ကိုဖမ်းစားနိုင်ခဲ့ပါတယ်။  Feredoon က သူမရဲ့ စာချူပ်ကိုလည်း နောက်ထပ်သုံးလ သက်တမ်းတိုးခဲ့ပါတယ်။ သူမ အောင်မြင်ခဲ့တယ်ဆိုပေမဲ့ သူမကိုယ်တိုင်လည်း   Feredoon  ကို နက်နက်ရှိုင်းရှိုင်းတွယ်တာ မိသွားပါတော့တယ်။

အဲဒီအခြေအနေမှာ Feredoon ရဲ့ဖခင်က မုဆိုးဖိုဖြစ်တဲ့သားကို Naheed နဲ့  စေ့စပ်ကမ်းလှမ်းခဲ့ပါတယ်။  Feredoon ကိုယ်တိုင်ကလည်း Naheedရဲ့ ဂုဏ်အဆင့်အတန်းနဲ့  အချောအလှသတင်းကိုကြားပြီး လက်ခံခဲ့တာပါ။ အဲဒါကို သိလိုက်ရတဲ့အချိန်မှာတော့ Azizam ရဲ့ ကမ္ဘာကြီး ချာချာလည်သွားခဲ့ရပါတယ်။ Feredoon ကတော့ နှစ်ယောက်လုံးကို ပေါင်းသင်းမှာဖြစ်ကြောင်း Azizam ကို ခပ်အေးအေးဘဲ တုံ့ပြန်ပြောပြခဲ့ပါတယ်။ ဦးလေးတွေ အဒေါ်တွေနဲ့တိုင်ပင်တဲ့အခါမှာ ( ဇနီးအများအပြား တပြိုင်နက်ယူတာ နဲ့  အပျော်မယားယူတာ လက်ခံထားလေ့ရှိတဲ့ သူတို့ထုံးစံကြောင့် မထူးဆန်းတော့ဘဲ)  Azizamကို ပိုနေမြဲ ကျားနေမြဲ နေဖို့၊ ရေငုံနှုတ်ပိတ်နေဖို့   အကြံပေးခဲ့ပါတယ်။ Azizam ဟာ သူငယ်ချင်း Naheedကို သွားတွေ့ခဲ့ပေမဲ့ သူ့အကြောင်းကို ပြောမထွက်ခဲ့ပါဘူး။  သူ့အကြောင်းသိရင်တောင်မှ မင်္ဂလာကိစ္စက ပျက်မှာမဟုတ်တဲ့အပြင် အားလုံးမျက်နှာပျက်ရုံသာရှိမယ်လို့  တွေးမိလို့ပါ။  နောက်ပြီးသူကိုယ်တိုင်က  Feredoon ကို မပြတ်နိုင်တာလည်း တကြောင်းဖြစ်ပါတယ်။  သူငယ်ချင်းရဲ့ မင်္ဂလာဆောင်မှာ ဟန်လုပ်ပြုံးနေရပေမဲ့ ရဲ့ Azizam စိတ်ထဲမှာ ပူပြင်းလောင်မြိုက်နေပါတယ်။  Feredoon က မကြာခင်ပြန်ပြီး ဆင့်ခေါ်ပြီး သူတို့ရဲ့ဇာတ်လမ်းကို ဆက်လက် ကပြပြန်ပါတယ်။  Naheed အနေနဲ့  နဂိုရ်ကပင် Feredoon ကို မချစ်တဲ့အတွက် ခပ်ရှောင်ရှောင်နေလေ့ရှိတာကိုလည်း သူမကိုယ်တိုင်ပြောပြလို့  သိခဲ့ရပါတယ်။  တနေ့မှာ သူတို့ရဲ့  တိတ်တိတ်ပုန်းဇာတ်လမ်းကို Naheed သိသွားပြီး  ဒေါသအိုးပေါက်ကွဲပါတော့တယ်။  Azizamက အကြောင်းစုံပြောပြတဲ့အခါ သစ္စာမရှိတဲ့ သူငယ်ချင်းအဖြစ်စွပ်စွဲခံရပြီး Azizamကို သူ့ဘ၀ထဲက မောင်းထုတ်ခဲ့ပါတယ်။  Feredoonက နောက်ထပ် သုံးလ ထပ်ငှားတဲ့အခါမှာတော့ Azizam ဆုံးဖြတ်ချက်တခုကို ပိုင်ပိုင်နိုင်နိုင်ချပြီး ဦးလေးမိသားစုမသိခင် တိတ်တိတ် ငြင်းပယ်တဲ့စာ ပို့ခဲ့ပါတော့တယ်။  ဒါကိုဦးလေးနဲ့အဒေါ်သိတဲ့အခါ သူတို့ကော်ဇောဖောက်သည်ကို ငြိုငြင်အောင်လုပ်တဲ့အတွက် စိတ်ဆိုးခဲ့ပါတယ်။  တခါ Naheedရဲ့ မိဘနဲ့အဆက်အသွယ်တွေက ကော်ဇောအော်ဒါတွေ ရုပ်သိမ်းကုန်ကြတဲ့အခါ အကုသိုလ်အားလုံးဟာ Azizam  ဂြိုလ်မွှေလို့ဆိုပြီး အဒေါ်က ပြောလာပါတယ်။  Azizam က သူမကို ဒီဘ၀ရောက်အောင်တွန်းပို့ခဲ့တာ ဘယ်သူတွေပါလဲလို့  မေးခွန်းပြန်ထုတ်တဲ့အခါ ဦးလေးရော အဒေါ်ပါ ဆတ်ဆတ်ခါအောင်နာပြီး Azizamတို့သားအမိတတွေကို အိမ်က နှင်ချခဲ့ပါတော့တယ်။ 

Azizam ရဲ့ဘ၀က မုန်တိုင်းထန်လှပါတယ်။  သူမချစ်တဲ့သူ၊ သူငယ်ချင်း၊ ဆွေမျိူး အားလုံးက သူမကို ပစ်ပယ်ထားလိုက်ပါပြီ။ သူမ ပိုင်ဆိုင်တာဆိုလို့  ယက်လုပ်ပြီးစ အဖိုးတန်ကော်ဇောတစ်ချပ်နဲ့   အငှားမယားဘ၀ကရတဲ့ ငွေသားအနည်းငယ်ပဲ ကျန်ပါတော့တယ်။  ဒါနဲ့ပဲ ကော်ဇောယက်သမ ဆင်းရဲသူမတယောက်အိမ်မှာ ကပ်ရပ်နေထိုင်ပြီး သူမကော်ဇောကို ဖောက်သည်ကောင်းရှာပြီး ရောင်းဖို့ကြိုးစားခဲ့ပေမဲ့  လူလိမ်ခံခဲ့ရပါတယ်။  စားစရာမရှိတော့လို့  နေမကောင်းတဲ့အမေအတွက်တောင် ကျွေးစရာမရှိလို့   ဗလီရှေ့မှာ သွားတောင်းရမ်းရတဲ့အထိ ဖြစ်ခဲ့ပါတယ်။  ဒါပေမဲ့ သူမကို ငွေကြေးပြပြီး ချဉ်းကပ်လာတဲ့ လူမသမာတွေကိုတော့ ကြိုးစားပြီး ရှောင်ရှားခဲ့ပါတယ်။  သူမဘ၀ ရေတိမ်နစ်လုလုအချိန်မှာ ဦးလေးဆီကို သွားရောက် အသနားခံခဲ့ပါတယ်။  နောင်တရပြီး သနားစိတ်ဝင်နေတဲ့ ဦးလေးက ငွေစတချိူ့ပေးလိုက်လို့  အစားအသောက်နဲ့ ဆေးဝယ်နိုင်ပြီး အမေပြန်နေကောင်းလာတဲ့အပြင် သူမကိုယ်ပိုင် ကော်ဇောတစ်ထည်ကို ပြန်ယက်နိုင်ခဲ့ပါတယ်။  ဦးလေးရဲ့ကူညီမှူ၊ သူမရဲ့ ပါရမီ ထက်မြက်မှု၊  မနားမနေကြိုးစားမှုတွေကြောင့် နောက်ဆုံးမှာ အောင်မြင်တဲ့ ကော်ဇောယက်ပညာရှင်တဦး ဖြစ်လာခဲ့ပါတယ်။  နောက်ဆုံးမှာ ရှားဘုရင်ရဲ့ ထီးသုံးနန်းသုံး လုပ်ငန်းရှင်တစ်ဦး ဖြစ်လာခဲ့ပါတယ်။

အခုဆိုရင်  Azizam ဟာ (သူတို့ထုံးစံအရ) လက်ထပ်သင့်တဲ့အရွယ်ထက် ကြီးနေပါပြီ။  ဒါပေမဲ့ သူမဟာ အောင်မြင်တဲ့ လုပ်ငန်းရှင်အမျိူးသမီးတဦး လှပတဲ့မိန်းမတဦးဖြစ်နေပါသေးတယ်။  အမှားတခုကြောင့် သူမရဲ့နှလုံးသားမှာ ဒဏ်ရာနက်နက်တခုရှိနေခဲ့ပေမဲ့ အနာဂတ်တချိန်ချိန်မှာ စိတ်တူကိုယ်တူ ချစ်သူတယောက် ရှိလာနိုင်ပါသေးတယ်။  တချိန်မှာတော့ သူမကို တကယ်မြတ်နိုးတဲ့ သူတယောက် ရှိလာနိုင်ကောင်းရဲ့ လို့   သူမကိုယ်တိုင် မှန်းဆရင်းနဲ့  ဇာတ်လမ်းကို အဆုံးသတ်ထားပါတယ်။

လဲကျရာက အကြိမ်ကြိမ်ပြန်ထရတဲ့ မိန်းကလေးတယောက်ရဲ့ ဘ၀ကောက်ကြောင်းလေးကို ပါရှန်းကော်ဇောလုပ်ငန်းနဲ့    လုပ်သားတွေရဲ့ဘ၀ကို ရှားဘုရင်လက်ထက် ၁၇ရာစုနောက်ခံနဲ့   စိတ်ဝင်စားလောက်အောင် တင်ပြထားပါတယ်။  အီရန်က သူတို့ခေတ် အမျိူးသမီးတွေရဲ့ ဘ၀ကိုလည်း ထင်ဟပ်ပြထားပါတယ်။ အီရန်နိုင်ငံရဲ့ ဘုံရေချိူးခန်းဓလေ့ကို တော်တော်အသားပေးဖေါ်ပြထားပါတယ်။ Adultery Scene တော်တော်များများ ပါပေမဲ့မဖတ်ချင်ရင် ကျော်သွားပေါ့နော်။  အခန်းတိုင်းနီးပါးမှာ ရိုးရာပုံပြင်ကလေးတွေ တော်တော်များများပါပြီး ပုံပြင်တိုင်းက လူ့သဘာဝကို အသေးစိတ် ချယ်မှုန်းပြထားတာမို့  အစမှ အဆုံးတိုင်ဖတ်လို့မငြီးတဲ့  စာအုပ်ကလေးတအုပ်ဖြစ်ပါတယ်။


မိုးစက်ပွင့်
Photo credit:   "carpets" in http://www. flickr.com

4 comments:

  1. မိုးစက်ရေ
    ဇာတ်လမ်းကလေးကတော်တော်ကို စိတ်ဝင်စားဖို့ကောင်းတယ်
    မိုးစက်ပြောပြတာနဲ့တစ်ပုဒ်လုံးကို ခြုံငုံမိပြီး ကိုယ်တိုင်ဖတ်လိုက်ရသလို ခံစားရတယ်...
    ဒီလို ကြိုးစားတဲ့မိန်းခလေးတစ်ယောက်ရဲ့ ဘ၀ကိုလဲ လေးစားအားကျမိတယ်..
    ရိုးရာဓလေ့နဲ့ နှိုင်းယှဉ်ပြီးရေးထားတဲ့ ၀တ္ထုကောင်းလေးတစ်ပုဒ်ပါ.. မျှဝေပေးတာကျေးဇူးနော်..

    ReplyDelete
  2. စာအုပ်မဖတ်ပဲ အီရန်မိန်းကလေးဘ၀နဲ့ သူတို့ ဓလေ့တွေအကြောင်း သိရတာ ကောင်းလိုက်တာ၊
    နောက်လည်း ရေးပြပါအုံးနော်။

    ReplyDelete
  3. ကမ္ဘာပေါ်မှာ စိတ်ဝင်စားစရာအကောင်းဆုံး အမျိုးသမီးတွေအကြောင်းလို့ပြောရင် အီရန်သူတွေက ထိပ်ဆုံးနေရာက ပါမယ် ထင်ပါတယ်...

    စာတွေအများကြီး ဖတ်ဖြစ်နေတယ်ဆိုတော့ ကောင်းတာပေါ့...

းဝ)

    ReplyDelete
  4. If you’re just starting to learn English, Check this FREE site
    www.speaktomeenglish.com

    ReplyDelete

ပဲ့တင်သံလေးတွေ .......