အညာဘုရားဖူး

စာအုပ်အမည် – လိုက်ကြမလား အညာဘုရားဖူး
ရေးသူ - အံ့မောင်
စာအုပ်တိုက် - သီဟရတနာစာပေ
ထုတ်ဝေချိန် - ဇူလိုင် ၂၀၀၉


 
စာရေးဆရာကြီး (ဦး)အံ့မောင်က မိုးဝေမဂ္ဂဇင်းမှာ အစ် နှင့် ခရစ်စတီနာ ပါဝင်သော အန်ဒါးဆင်းပုံပြင်များ ဆက်တိုက်ရေးဖွဲ့ခဲ့သူဖြစ်ပါတယ်။ ခရီးသွားဆောင်းပါးတွေ စုပေါင်းထားတဲ့ ဒီစာအုပ်ကို သုတရသစာပေအမျိူးအစားလို့ ဆိုချင်ပါတယ်။
ဆရာဟာ ခေတ်မျိူးစုံကြုံခဲ့သူမို့ သမိုင်းအမြင် ဘ၀အမြင်စုံလှပါတယ်။ အညာဇာတိဖြစ်ပြီး အဖွဲ့အနွဲ့ အသုံးအနှုံး လှပကောင်းမွန်ပါတယ်။ စွဲငြိလောက်တဲ့ အသုံးအနှုံးလေးတွေကတော့ ”နွေမင်းသမီးထနောင်း” ” ဦးပိန်တံတားကင်းခြေများကြီး လမ်းလျှောက်တဲ့မြို့” ”ဇီဝနို့ချိူသစ်ပင်” ”ကြိုးကြီးချိတ်ရှုံးတဲ့လမ်း” ”သပြေရွက်ရောင်ချင်းတွင်းရေ” ”ဧရာဝတီမြဖန်သား” တို့ဖြစ်ပါတယ်။
စာအုပ်တဲမှာ မှတ်စရာတွေ တစ်လှေကြီးပါ။
ရှေးမြန်မာဘုရင်များခေတ်က နိုင်ငံကို တိုင်းကြီး (၁၀)တိုင်း ခွဲခဲ့ပါသတဲ့။
၁) လယ်ကိုင်း၊ ဖောင်းလင်း၊ ကလေး၊ သောင်သွပ် စတဲ့ ဧရာဝတီ အနောက်ဖက်အရပ်ဒေသတွေကို သုနာပရန္တတိုင်း၊
၂) ပုဂံ၊ပင်းယ၊အင်းဝ၊မန္တလေး စတဲ့ ဧရာဝတီအရှေ့ဖက်အရပ်တွေပါဝင်ရာကို တမ္မျဒီပတိုင်း၊
၃) သီပေါ၊ ညောင်ရွှေ၊မိုးနဲ စတဲ့ ကမ္ဘောဇတိုင်း၊
၎) ဗမ်၊ခွေးလုံ၊စန္ဒာ စတဲ့အရပ်တွေပါဝင်ရာ ဇိန်တိုင်း၊
၅) သရေခေတ္တရာ၊ ဥဒေတရစ်၊ ပန်းတောင်းစတဲ့အရပ်တွေပါဝင်ရာ သီရိခေတ္တရာရာမတိုင်း၊
၆) ကေတုမတီ၊ ဇယ၀တီ စတဲ့အရပ်တွေပါဝင်ရာ ရာမညတိုင်း၊
၇) ဟံသာဝတီ၊ဒဂုံ၊ဒလ၊ကုသိမ်၊ရောင်မြ (မြောင်းမြ)၊မုတ္တမ စတဲ့အရပ်တွေပါဝင်ရာ ရာမညတိုင်း၊
၈) ဇင်းမယ်၊ ကျိူင်းသည် စတဲ့အရပ်တွေပါဝင်ရာ ဟရီဘုဉ္စတိုင်း၊
၉) ကျိူင်းတုံ စတဲ့အရပ်တွေပါဝင်ရာ ခေမာဝရတိုင်း၊
၁၀) ကျိုင်းရုံး၊ မိုင်းစည် စတဲ့အရပ်တွေပါဝင်ရာ မဟာနဂရတိုင်း၊ တို့ဖြစ်ပါတယ်။
အာသံ နဲ့ မဏိပူရကိုပါအုပ်ချူပ်လာတဲ့ ကုန်းဘောင်ခေတ် အမရပူရမင်းနေပြည်ကတော့ မြန်မာပြည်ရဲ့အကျယ်ဆုံးနယ်ပယ်ကို အုပ်ချူပ်ရာမင်းနေပြည် လို့ဆိုပါတယ်။

အညာဒေသရဲ့ ဂုဏ်ဆောင် အထင်ကရတွေကိုလည်း မှတ်သားရပါတယ်။
က) ကမ္ဘာပေါ်မှာ ဆင်းတုတော်အများဆုံး မိုးညှင်းသမ္မုဒ္ဒေစေတီတော်။ ။ ”ရှစ်သောင်းလင်း မိုးညှင်းစေတီရံ”ဆိုတဲ့အတိုင်း စေတီရံ ၈၆၄ဆူ၊ ”မြရွှေငွေစိန်သီးဆောင်း ဘုရားပေါင်း”ဆိုတဲ့အတိုင်း စေတီတော်နံရံမှာ အဆင့်တွေခြားပြီးပူဇော်ထားတဲ့ ရုပ်ပွားတော်ပေါင်း ၅၈၂၃၆၃ဆူ ရှိပါသတဲ့။ ၁၉၃၉မှာ အုတ်မြစ်ချ၊ ၁၉၄၀မှာထီးတော်တင်ပြီး ၁၉၅၈မှာမှ လုံးဝပြီးစီးပါတယ်။ ပုံတော်တွေဖန်တီးစီမံသူက မိုးညှင်းဆရာတော်ဘုရားကြီး။ သရွတ်ဖျော်စပ်ပုံက (ထုံး ၂ပုံး၊ သဲ ၃ပုံး၊ အုတ်မှုန့်တစ်ပုံးနဲ့အကြမ်းဖျော်စပ်ပြီး ဥသျှစ် ၁ပုံး၊အုံတုံ ၅ပုံး၊ ကျွဲကော်ရည် ၆ ပုံး၊ တင်လဲ ၂ပုံးနဲ့ နှပ်ပါသတဲ့)။ ပန်းကနုတ်အနုတွေအတွက် လဲဝါတစ်ဆုပ်၊ ဆီတစ်မှူတ်ထပ်ထည့်ထောင်းပြီးစပ်ပါသတဲ့။ ပန်းရံဆရာကြီးလက်ခက တစ်ရက် တစ်ကျပ်နှုန်းနဲ့တည်တာတောင် သိန်း နှစ်ဆယ်ကုန်ပါသတဲ့ (ဒီနေ့ခေတ် ၅၀၀၀ ကျပ်နှုန်းလောက်နဲ့ မြှောက်ကြည့်ပါလေ)။ ငလျင်ဒဏ်တောင်ခံတယ်လို့ ဆိုပါတယ်။
ခ) မဟာဗောဓိတစ်ထောင်တော။ ။ မိုးညှင်းနဲ့လေးမိုင်လောက်အကွာ ကျောက်ကာတောင် ခေါ် ခံတက်ကန်တောင် ခေါ် နွယ်ခွေတောင်ရိုးပေါ်မှာ တီဘီဝေဒနာကနေ သေရွာပြန်ဆရာတော် အရှင်နာရဒ ၁၉၆၀ကနေ စ စိုက်ထားတဲ့ ဗောဓိပင် ၁၇၀၀ ကျော် (အခုဆို ၉၀၀၀နီးပါးရှိပြီထင်ပါရဲ့-မမဆူဇီမေ) နဲ့အတူ ၂၁၅တောင်ရှည် လျောင်းတော်မူစေတီတော်ကြီးနဲ့ ကမ္ဘာ့အမြင့်ဆုံး မတ်ရပ်ကိုယ်တော်ကြီးကို ဖူးနိုင်ပါတာ်။ မတ်ရပ်ကိုယ်တော်ကြီးက အထပ်၃၀နီးပါးရှိပြီး ကိုယ်တော်အတွင်းထဲမှာဝင်ပြီး လှေခါး သို့မဟုတ် ဓါတ်လှေခါးနဲ့ အထက်တက်နိုင်ပါတယ်။
ဂ) ဖိုဝင်းတောင်။ ။ မုံရွာအနောက်ဖက်၁၆မိုင်အကွာကတော့ ကျောက်သားကို ဘုရား၊ဂူ၊ပလ္လင်တွေ ပျားအုံလို မွမွကြဲနေအောင် ထွင်းထုတည်ဆောက်ထားတဲ့ နေရာပါတဲ့။ ပျူခေတ်လက်ရာတွေ၊ ပုဂံခေတ်နံရံဆေးရေးပန်းချီတွေတောင်ရှိပါသတဲ့။ မျောက်တွေကလည်း အလွန်ပေါဆိုဘဲ။ အနီးတစ်ဝိုက်က ရွှေဘတောင် နဲ့ နောက်ထပ်လေးမိုင်အကွာက အင်ကြင်းတောင်မှာလည်း ဧရာမကျောက်သားလျောင်းတော်မူကြီးက အံ့မခန်းစရာပါတဲ့။
ဃ) အလောင်းတော်ကဿပ။ ။ မဟူတောင်နဲ့ ပုံတောင်ပုံညာအနီးက တောင်သုံးလုံး ဖိုခနောက်ဆိုင်နေရာမှာ ဘုရားရှင်ရဲ့ သာဝက အရှင်ကဿပမထေရ်ကြီး ရုပ်အလောင်းတော်ရှိရာဂူရှိတယ်လို့ ယုံကြည်ကြပါတယ်။ ကာကွယ်တော၊ ဂန္ဒကုဋ္ဋီတိုက် စိမ့်စမ်းရေ ရှိရာအရပ်လို့ဆိုပါတယ်။
ထင်ရှားကျော်စောတဲ့ ပုဂ္ဂိုလ်ကြီးများရဲ့ ဇာတိမြေဖြစ်ပါသတဲ့။
- စစ်သူကြီး မဟာဗန္ဒုလ(ဘုတလင်မြို့နယ် ငပယင်းရွာ)
- မြ၀တီမင်းကြီးဦးစ (ဘုတလင်မြို့နယ် မောက်တက်ရွာ)
- စိန္တကျော်သူ ဦးသြ (ဘုတလင်မြို့နယ် ၀န့်တုံရွာ)
- သခင်ကိုယ်တော်မှိူင်း(ဘုတလင်မြို့နယ် မောင်းထောင်ရွာ)
- သံချိူဆရာဦးကျော်လှ (ဘုတလင်မြို့နယ် မောင်းထောင်ရွာ)
- တွင်းသင်းမင်းကြီး ဦးထွန်းညို(ဘုတလင်မြို့နယ် မောင်းထောင်ရွာ)
- (ဦး)သိန်းဖေမြင့် (ဘုတလင်မြို့နယ် မောင်းထောင်ရွာ)
- ရာဇောဝါဒ ကျမ်းပြု မုံရွေးဆရာတော်ဘုရားကြီး (မုံရွေး၊ကြေးမုံ)
- ဆရာစံ (ဒီပဲယင်းမြို့နယ်၊ သရက်ကန်ရွာ)
-ဆရာ မြသန်းတင့် (မကွေးတိုင်း၊ မြိုင်မြို့နယ်)
- အိုးဝေ ဦးညိုမြ ( ချောင်းဦးမြှိုနယ် အမြင့်ရွာ)
- မြို့ဝန်မင်းလက်ဝါးကြီး ( ချောင်းဦးမြှိုနယ် အမြင့်ရွာ)
- ဆရာတော် ဦးဝိစာရ ( ချောင်းဦးမြှိုနယ် အနိမ့်ရွာ)
- သခင်လေးမောင် ( ချောင်းဦးမြှိုနယ် အနိမ့်ရွာ)
စာရေးသူ ဆရာအံ့မောင်က ရောက်တဲ့နေရာတိုင်းမှာ သစ်ပင်တောတောင်တွေကို တစ်မြတ်တစ်နိုးကြည့်ခဲ့တာပါပဲ။ သစ်ပင်သစ်တော ပါးရှားသွားတဲ့နေရာတွေရောက်ရင် ၀မ်းနည်းစိတ်မကောင်းဟန်တွေ ရေးထားတာတွေ့ရပါတယ်။ ”စိမ်းမြဆံကေသာတို့ ပါးလျ၍ နီမြန်းသောဦးရေပြားတို့ ဟိုတစ်ကွက် ဒီတစ်ကွက်” ဆိုတာမျိူး သုံးနှုံးထားပါတယ်။ ဆရာ့ ကဗျာတိုကလေးတွေနဲ့ နိဂုံးချူပ်ပါရစေ။
ကျွန်း
ကိုင်းပင်တွေစိမ်းထောင်
မြငွေသောင်လှီးထားတဲ့ကျွန်း။
နှင်းဆီတစ်ပွင့် ဆင်
၁၈-နှစ်လုံမေခင်သို့
မြစ်ပြင်လွန်ဟိုဖက်ကမ်း
တက်လှမ်းလာဇာနည်ဖွားကို
မျှော်စားလို့လွမ်း။
နန်း
ကိုင်းတောစမ်း လွှမ်းတဲ့ကျွန်းပေါ်
သက်ကယ်တဲကလေးကနန်းတော်။
သောင်
သောင်ပြင်
ဆောင်းတစ်ခွင်တုန်းကတော့
စုရုံး မယ်ညို ဟင်္သာ
မည်းနေတာပဲ။
နွေပိုင်း
ဗျိုင်းတစ်ကောင်နှစ်ကောင်
ငေးယောင်ဖေါ်ကွဲ။
တဲ
ကြည့်မဆုံးတဲ့သောင်ပြင်ကျယ်ပေါ်
ကရော်ကမည်တဲလေးများ
မြစ်ပြင်နဲ့ကောင်းကင်ကြား
လွပ်လပ်ခြင်းရဲ့သား။
တောင်
ရှင်မတောင် နွားထိုးတောင်
ကောင်းကင်ကိုထောင်။
တောင်ပုလုတွေကိုယ့်အနား
ချိူင့်လျှိူကများ။

ကဗျာလေးတွေက တိုတိုရိုးရိုးစင်းစင်းကလေးတွေပါပဲ။ သဘာဝကိုချစ်တဲ့ စာရေးဆရာရဲ့ ရိုးသားတဲ့နှလုံးသားကို တိုးလျိူပေါက်မြင်ရတယ်လို့ဆိုချင်ပါတယ်။ အညာဟိုက္ကူလေးတွေပေါ့

မိုးစက်ပွင့်