Friday 25 June 2010

ကျွန်တော် မောင်ဘောလုံး ပြောရအုံးမယ်

 ကျွန်တော့်နာမည်က မောင်ဘောလုံး တဲ့။  အင်္ဂလိပ်တွေကတော့ ဖွတ်ဘော ( Foot ball) လို့  ကျွန်တော့်ကို ခေါ်တယ်။  ဒါကလည်း သူတို့ဆီမှာ လက်နဲ့ ပစ်ပေါက်ကစားရတဲ့ ဘေ့စ်ဘော (Base ball) နဲ့  ကွဲပြားအောင် ထင်ပါတယ်။  ဘာပဲပြောပြော ကျွန်တော်ကတော့ ဖွတ်ပါတဲ့ နာမည်မို့မကြိုက်ဘူး။ မြန်မာဆန်ဆန် အာလုပ်သံပါပါနဲ့   ဘောလုံး၊ ဘောလုံးကြီး လို့  ခေါ်တာကိုပဲ ကြိုက်ပါတယ်။

ကျွန်တော်က ခေတ်အဆက်ဆက် စူပါစတားပါ။  ဒီလိုပြောလို့ လွန်တယ်ထင်သလား။  မိုက်ကယ် ဂျက်ဆင်ကိုကြည့်ဗျာ။  သူ့ပရိသတ်ဟာ ကျွန်တော့်ပရိသတ်ထက် အရေအတွက် များမယ်ထင်သလား။     နိုင်ငံတကာမှာ ပျိူတိုင်းကြိုက်တဲ့ နှင်းဆီခိုင်ချင်း တူတယ် ဆိုစေဦး၊ ကျွန်တော်က နှစ်ပေါင်းများစွာ သူ့ထက်စောခဲ့သလို နောင် နှစ်ပေါင်းများစွာ (ကမ္ဘာတည်သရွေ့ လို့တောင် ပြောချင်တယ်)  ကြိုက်နေကြဦးမှာ။  

အဲလို ပြောလို့  ကျွန်တော်ကို မောက်မာတဲ့ ကျောက်ဖျာလို ငတိ လို့  နာမည်မတပ်လိုက်ပါနဲ့ ဗျာ။  တကယ်တော့ ကျွန်တော်ရဲ့  အနုံ့စိတ် အငုံ့စိတ်ကလေး တွေကို ကျွန်တော်ပဲ သိပါတယ်။  ဒါတွေကိုလည်း ခင်ဗျားကို ရင်ဖွင့်ပြချင်လို့ပါ။

တကယ်တော့ ပရိသတ်ဆိုတာ ဘောလုံးသမားကို အားပေးတာ၊ ဘောလုံးကို အားပေးတာမဟုတ်ဘူးဆိုတာ ကျွန်တော် ကောင်းကောင်း သိပါတယ်။  ကျွန်တော့်ကို လူပေါင်း ၂၂ယောက်က ဟိုဖက်က ကန်လိုက် ဒီဖက်က ကန်လိုက် နဲ့  ချာချာလည် မူးနေတာတောင်မှ ပရိသတ်ရဲ့ လက်ခုပ်သံတွေဟာ ကျွန်တော့်အတွက် မဟုတ်ဘဲ၊  ကျွန်တော့်ကို ကန်တဲ့ ဘော်ဒါ ဘောလုံးသမားကြီးတွေအတွက်ပဲဆိုတာ သိသမှ သိပ်သိပေါ့။  ဒါပေမဲ့ ဂိုးပေါက်ထဲကို ဂိုးဝင်သွားတဲ့အခါတိုင်း ဝေါခနဲကြားလိုက်ရတဲ့ လက်ခုပ်သံတွေ အားပေးသံတွေဟာ ကျွန်တော့် နှလုံးသားထဲစိမ့်သွားအောင် ပီတိဖြစ်စေခဲ့တယ် ဆိုတာ ခင်ဗျား ယုံသလား။ 

ခင်ဗျားက မေးချင်မေးလိမ့်မယ်။  နှစ်ဖက်အသင်း ရှိရာမှာ ဘယ်ဖက်ကိုဝင်ရင် ပျော်ပြီး ဘယ်ဖက်ကိုဝင်ရင် ၀မ်းနည်းတာမျိူးရှိသလား လို့။  အဲဒီလိုတော့မရှိဘူးဗျိူ့   ။ ကျွန်တော်က ဘော်ဒါ ဘောလုံးသမား အားလုံးကို မျှမျှတတ ခင်တာပါ။  သူတို့ရဲ့ ရည်ရွယ်ချက်ဟာ ဂိုးတိုင်ထဲကို ဘောလုံးဝင်ဖို့။ အဲဒီလို ဖြစ်ဖို့အတွက် ပါဝင် သရုပ်ဆောင်ရတဲ့ ကျွန်တော်မောင်ဘောလုံးဟာ  ဂိုးသမားလက်က လွတ်လွတ်ကျွတ်ကျွတ် တိုင်ထဲဝင်ခွင့်ရလို့ကတော့ အမြဲတမ်း ပျော်နေသူပါ။  ကျွန်တော်ကတော့ ဘယ် ဂိုးတိုင်ပဲဖြစ်ဖြစ် ဂိုးဖမ်းသမားကို ကျော်လွန်ပြီး ဂိုးတိုင်ထဲကို တာဝန်ကျေကျေ လှလှပပလေး လှိမ့်ဝင်ဖို့  အမြဲ ရည်ရွယ် ထားသူပါ။  အဲဒီအောင်မြင်မှုက ၁၁ယောက်သော ဘော်ဒါကြီးများနဲ့ ပရိသတ်တွေအတွက် ၀မ်းနည်းစရာ ဖြစ်ခဲ့မယ်ဆိုရင် တောင်းပန်ပါတယ်။ တကယ်ကတော့ ဘောလုံးပွဲမှာ (သူမသာ၊ ကိုယ်မနာ) ဆိုတဲ့ ၀င်းဝင်း တံဆိပ် ဖယောင်းတိုင်တွေ မရှိပါဘူးဗျာ။ တယောက်နိုင်ရင်၊ တယောက်ရှူံးမယ်။  ဂိုးဝင်တာမှာလည်း နှစ်ဂိုးခွဲ၊ တစ်ဂိုးနဲ့ တမတ်တို့ မရှိပါဘူးဗျာ။  နိုင်ရင်နိုင်၊ ရှူံးရင်ရှူံး၊ သရေမှာတောင် အမှတ်နဲတွက်ပြီး အရှူံးအနိုင် ဖြတ်လို့ရသေးရဲ့။  အဲဒီလို ပြတ်သားလို့၊ လိမ်ညာမရလို့   ဘောလုံးပွဲကို လူတွေ အသည်းခိုက်တာလို့ ပြောတဲ့လူက ပြောကြတယ်။  ကျွန်တော်ကတော့ အဲဒီအဆိုကို အပြတ်ထောက်ခံတယ်ဗျိူ့။  ကိုယ့်ကို အကောင်းပြောလို့ကတော့ ချွင်းချက်မရှိထောက်ခံသူတွေထဲမှာ ကျွန်တော်လဲပါတယ်။

ဘောလုံးသက်ကြာလာတာနဲ့အမျှ ကျွန်တော့မှာ ဘောသံဝေဂတွေ အများကြီးရလာတယ်။  အရင်တုန်းက ပရိသတ်ရဲ့ အချစ်တော် ဘောလုံးရွှေမင်းသားလေးတွေ၊ အခုတော့ လူတွေက မေ့နေကြပြီ ဆိုတာမျိူးတွေ။  ဘောလုံးဘယ်လောက်ပဲတော်တော် ပရိသတ်ကို မထီမဲ့မြင်လုပ်လို့ကတော့ လှလှပပ ဒဏ်ခတ်ခံရတတ်တယ် ဆိုတာမျိူးတွေပေါ့။  နောက်ပြီး အသက်နဲ့ အတွေ့အကြုံကြောင့်တခါတခါ ဘောလုံးကွင်းထဲက အဖြစ်တွေကို လူ့ဘ၀ လူ့သဘောတွေနဲ့  နှိုင်းယှဉ်တတ်လာတယ်။ 
ကွင်းထဲမှာ ဘောလုံးကိုမကန်ဘဲ  လူချကစားတတ်တဲ့သူတွေ
-  ဘောလုံးကို အပေးမယူမလုပ်ပဲ ကိုယ့်ခြေထဲမှာပဲ ကစားသွားတဲ့သူတွေ၊
-  ပရိသတ်ကို လက်ခလယ်ထောင်ပြဖို့ ၀န်မလေးတဲ့ ကစားသမားတွေ
- အဂတိလိုက်စားတဲ့ ဒိုင်လူကြီးတွေ
- အ၀ါကတ်ရပြီးသားမို့   ခပ်ကြမ်းကြမ်းထပ်မကစားရဲတော့တဲ့သူတွေ
- တချိန်က ပရိသတ်ချစ်ခဲ့ပေမဲ့ ပရိသတ်ကို နှုတ်နဲ့ပြန်စော်ကားလို့  ဇာတာမှေးမှိန်သွားသူတွေ
- ကိုယ့်အသင်းအလဲလဲ အကွဲကွဲရှုံးခဲ့တာတောင် နိုက်ကလပ်အသွားမပျက်တဲ့ ကြေးစားအားကစားသမားတွေ
- ခေါင်းအကွဲခံပြီး ဂိုးကို ကာကွယ်ခဲ့တဲ့ ဂိုးဖမ်းသူတွေ
- အကြိမ်ကြိမ်လဲကျပေမဲ့ အကြိမ်ကြိမ် ပြန်ထပြီး ဇွဲမာန်မလျော့တဲ့ ကစားသမားတွေ
- တိုက်စစ်မှူးဂိုးသွင်းနိုင်အောင် မထင်မရှားနေရာက ကစားကွက်ပုံဖေါ်ပေးခဲ့ရသူတွေ
- အရံခုံမှာထိုင်ရင်း ကိုယ့်အလှည့်ကို မျှော်တလင့်လင့်ဖြစ်နေသူတွေ

အို- စုံလို့စုံလို့ ပါပဲဗျာ။  သတိထားကြည့်မယ်ဆိုရင်  အိမ်တွေမှာ၊ ရုံးတွေမှာ၊ ကျောင်းတွေမှာ ၊ နိုင်ငံတွေမှာ အထိ ဒီလိုလူမျိူးတွေနဲ့   ဒီလိုအဖြစ်မျိူးတွေ တွေ့ရတတ်ပါပေရဲ့။

ဒါကြောင့် ဘောလုံးပွဲကြည့်တာကို “ငွေကုန်၊ သံပြာ”  “မျက်စေ့ညောင်း၊ အိပ်ရေးပျက်၊ ကွာစေ့ကုန်” တို့ဘာတို့ မပြောနဲ့ဗျ။  ကြည့်တတ်ရင် တရားရတယ်။  ယူတတ်ရင် တရားရတယ်။ များများသာ ကြည့်ကြပါ။

ဘောလုံးပွဲပြီးလို့    အနိုင်ရအားကစားသမားတွေ ခုန်ပေါက် ပွေ့ဖက်ပြုံးပျော်နေချိန်မှာ၊  ဂိုးတိုင်ဒေါင့်တစ်နေရာမှာ ငြိမ်ငြိမ်ကလေး ရပ်ပြီး ပီတိဖြာနေတဲ့ ကျွန်တော် မောင်ဘောလုံးကလေးကိုလည်း တချက်ကလေးဖြစ်ဖြစ် သတိရကြမယ်ဆိုရင် တဖုန်းဖုန်း အကန်ခံရကျိူးနပ်ပါပြီလို့   ပြောလိုက်ချင်တယ်ဗျာ။




 မိုးစက်ပွင့်


ပို့စ်လေးတင်ပြီးတော့မှ ညက သတိရတာလေးတွေ ပြန်ဖြည့်ရေးမလို့    ... ဒါပေမဲ့ သူငယ်ချင်းတွေက ဖတ်ပြီးသားလေးဖြစ်နေတော့  စာတစ်ပုဒ်ဖြစ်အောင် သတ်သတ်ကလေး ရေးလိုက်တာပါ)

2 comments:

  1. အီးတီ25 June 2010 at 18:28

    မောင်ဘောလုံးရေ..ဖတ်သွားတယ်။

    ReplyDelete
  2. မောင်ဘောလုံးရဲ့ ဖွင့်ဟ၀န်ခံချက်ကို နားလည်ပါတယ်ကွာ

    ReplyDelete

ပဲ့တင်သံလေးတွေ .......